Што е EACHA и зошто Скопје станува центар на престижен настан за европската платежна индустрија?

Во мај оваа година, македонскиот платежен сектор ќе биде домаќин на настан од исклучително значење. КИБС АД Скопје ја презема улогата на домаќин на престижната годишна конференција на EACHA (European Automated Clearing Houses Association).

Но, што точно претставува оваа асоцијација и зошто нејзиното присуство во Скопје е стратешки важно за трансформацијата на нашиот платежен сектор?

Што е EACHA?

EACHA, односно Европската асоцијација на автоматизирани клириншки куќи, претставува највисокиот технички и стратешки форум за соработка на клириншките институции во Европа. Оваа асоцијација ги обединува европските оператори на платни системи, кои се одговорни за процесирање на милиони меѓубанкарски трансакции секој ден. EACHA е местото каде што се дефинираат стандардите и интероперабилноста се разменуваат информациите за иновации и се крои иднината на европскиот платежен екосистем.

Европа доаѓа во Скопје: Кој сè ќе присуствува?

Kонференцијата во Скопје се карактеризира со исклучително висок профил на учесници, што ја позиционира како еден од најрелевантните настани во европската платежна индустрија.

Настанот ќе собере близу 150 учесници од дури 30 европски земји.

Предавачите и делегатите доаѓаат од:

• Европските клириншки куќи

• Меѓународни институции од платежниот сектор

• Глобални ИТ и консултантски компании

• Институции кои имаат клучна улога во развојот на платежните услуги и платните системи

Меѓу присутните ќе бидат високи менаџери, експерти за плаќања, платни системи и дигитална трансформација, управување со ризици и иновации –луѓето кои директно ја креираат европската платежна агенда.

Стратешко значење за Македонија

Оваа широка географска застапеност овозможува размена на искуства помеѓу зрелите и пазарите во развој. За домашната стручна јавност, ова не е само настан за пасивно следење предавања. Напротив, претставува уникатна можност за директна дискусија со водечките европски експерти и оператори, токму во време кога македонскиот платежен пазар активно се трансформира кон инстант и дигитални плаќања.

Како што истакнуваат од КИБС АД Скопје, конференцијата на EACHA не е само платформа за размена на знаење, туку и стратешки момент за позиционирање на Македонија во рамките на европската платежна инфраструктура. Ова е шанса да се отвори широка дискусија за усогласување на нашите со европските иницијативи и активности, создавајќи одлични можности за вмрежување, партнерства и понатамошен развој на дигиталната економија.